طريقة عمل كريب المطاعهم الاقتصادى باستربس الدجاج المقرمش

 

طريقة عمل كريب باستربس الدجاج

يعتبر الكريب من الوجبات المحببه للجميع سواء الاطفال او حتى الكبار ويتهافتون عليه فى المطاعم والنهارده ان شاء الله حنعمل مع بعض كريب حادق مع حشوة دجاج الاستربس بطريقة المطاعم وبمكونات اقتصاديه من غير حليب او بيض تابعوا معانا الوصفه. قمنا بعمل الاستربس من قبل علىقناه اليوتيوب ولكن هذه طريقة اخرى.

مكونات الاستربس :

كوب لبن

كوب مياه

شرائح استربس

ملعقة كبيره خل

ملعقة صغيره بابريكا

ملعقة صغيره كزبره ناشفه

ملعقة صغيره ثوم بودر

ملعقة صغيره بهارات فراخ

نصف ملعقة صغيره فلفل اسمر

ملح حسب الرغبه

 

مكونات الغلاف الخارجى للاستربس :

كوب دقيق

ملعقة صغيره بابريكا

ملعقة صغيره كزبره ناشفه

ملعقة صغيره ثوم بودر

ملعقة صغيره بهارات فراخ

نصف نلعقة صغيره فلفل اسمر

ملح حسب الرغبه

 

مكونات الكريب :

2 كوب دقيق

2 كوب ماء

ملعقة صغيره ملح

ملعقة كبيره سكر

طريقة التحضير

تقدروا تتابعوا طريقة عمل الكريب الحادق باستربس الدجاج على قناتنا على اليوتيوب

اولا طريقة تحضير الاستربس

عشان نعمل استربس الدجاج اول حاجه بنقطع صدور الفراح شرايح بالطول بعد كده بنغسلها بالمياه والخل ونصفيها كويس ونروح نحضر تتبيلة الاستربس بتاعتنا .

حنجيب بوله ونحط فيها كوبايه لبن ومعلقة كبيره من الخل الابيض ونقلبهم ونسيبهم عشر دقايق لحد اللبن مايتروب بسبب فعل الخل وبعد كده حنحط كوبايه الميه وبعديها التوابل كلها زى ماذكرناها فى المقادير ونقلبهم كويس لحد مايدوبوا ويندمجوا كويس مع اللبن .

حنحط بعد كده قطع استربس الفراخ فى التتبيله ونغطيها ونحطها فى التلاجه مش اقل من ساعتين كاملين عشان الفراخ تشرب من التتبيله وتاخد من طعم التوابل.

نحضر بعد كده الغلاف الخارجى لاستربس الدجاج عن طريق ان احنا بنجيب كوبايه من الدقيق ونحط عليها نفس التوابل اللى تبلنا بيها استربس الدجاج ونقلبهم كويس جدا لحد المكونات ماتختلط ببعضها .

بعد ما الفراخ شربت من التتبيله او بعد من ساعتين لحد 12 ساعه نطلع استربس الفراخ من التلاجه ونبدا ان احنا نغطيها بالغلاف الخارجى اللى عملنا بس واحنا بنحضر الخطوه دى لازم يكون الزيت على النار سخن .

حنجيب شريحة استربس الدجاج ونحطها فى خليط الدقيق والتوابل وبعد كده حنطلعها ونحطها فى سائل التتبيل مره تانيه ونطلعها منها ونرجعها فى خلطه الدقيق والتوابل ونمسكها ننفضها عشان تعمل التعريجات اللى بنشوفها فى استربس الدجاج بتاع المحلات ونحطها فى الزيت مباشره ونكرر الخطوه دى مع كل قطع الاستربس ونهدى النار ونقلب فيها كل خمس دقايق لحد ماتاخد اللون الدهبى.

بعد اما الاستربس بيستوى معانا بنطلعه فى مصفى ونسيبه يتصفي من الزيت الزياده ويتهوى معانا بنروح بعد كده نحضر الكريب بتاعنا .

ثانيا طريقة تحضير الكريب :

تقدروا تتابعوا الطريقة على قناتنا على اليوتيوب من هنا :

حنجيب الخلاط بتاعنا ونحط فيه كوبايتين الميه ومعاهم كوبايتين الدقيق والملح والسكر ونضربهم كويس فى الخلاط مع مراعاه اننا كل شويه نحرك الخليط بمعلقه وننزل اللى على جوانب الخلاط عشان نضمن ان مفيش تكتلات معانا فى عجينة الكريب.

بعد اما الخليط يتجانس بنشوف القوام بتاعه لو تقيل زياده عن اللزوم نزود شويه ميه صغيرين لحد اما الخليط يبقة قوامه خفيف شويه مش تقيل اوى وبعد كده حنجيب مصفاه ونصفى فيها خليط عجينة الكريب.

بعد كده حنغطى عجينة الكريب بورق استرتش ونسيبها ترتاح لمده 10 دقايق او ربع ساعه عشان نبدا نعمل احلا كريب حادق ممكن تجريبه طري ومش بيتكسر ومهما تطبقى فيه مش حيحصله حاجه.

بعد ما الكريب ارتاح معانا حنلاقى قوامه تقل شويه وهو ده القوام المظبوط بتاعه حنجيب طاسه تيفال او طاسة كريب او صينية كبيره وندهنها دهنة زيت بسيطه بمنديل ونبدا نحط عجينة الكريب بمغرفة الشوربه على حسب حجم الصينيه او الطاسه ممكن تاخد مغرفتين من العجينة.

نبدا نحرك الصينيه عشان عجينة الكريب تتفرد فيها وننتظر لحد ما العجينه تتشمع ويبدا الحروف بتاعتها تفصل وتاخد لون بسيط من تحت واول ما الكريب يفصل من الجوانب نقلبها على الناحيه التانيه عشان تاخد لون من الجنب التانى كمان.

نطلع الكريب بعد ماخد لون من الجنبين ونسيبها تتهوى وبعد كده نغطيها بفوطه او قطعه قماش عشان متنشفش مننا ونكرر العمليه دى لحد مانخلص كل الكريب اللى معانا وممكن تضاعفى كمياتك بمقدار كوبايه دقيق قصاد كوباية مايه.

بعد ماخلصنا الكريب وهويناه ولفيناه بحته قماشه نروح نحضر مع بعض احلا ساندوتش كريب بحشوة دجاج الاستربس .

ثالثا حشو الكريب وتسويته الثانيه:

حنجيب الكريب بتاعنا ونطبقه نصين زى ماحتشوفوا فى الفيديو على قناة ست البيت على اليوتيوب ونحط شويه من الكاتشب وعليهم شوية مايونيز ونحط قطعه الاستربس وعليها بطاطس محمره وجبنه مودزريلا ونطبق الكريب لحد مايبقى زى المثلث .

وممكن اننا نسيب الكريبايه زى ماهى ونحط فيها نفس الحشوه وتطبقها من الجانبين ونبدا اننا نلفها زى السندوتش السورى كده بالظبط والطريقتين هايلين استخدمى اى طريقة منهم .

بعد مابتخلصى كميتك حتحطى طاسه على النار وعليها قطعه من الزبده وشوية زيت وتكون النار هاديه وتحطى فيها الكريب بعد ماحشيناه بقطع استربس الدجاج والحشوات اللى معاه على الجنب المقفول عشان يتحمر وميفكش تانى بعد ما تقلبيه .

اول ماياخد لون من الجنب الاول حنقلبه على الجنب التانى لحد مايتحمر وياخد لون من الجنب التانى وبعد كده تطلعيه وتقدميه لاولادك وبجد حينبسطوا بيه وحيفكروكى شرياه من بره .

دبرى ووفرى معانا واعملى كل الاكل اللى بتجبيه جاهز من بره فى بيتك مكونات بسيطه وطريقة سهله مش حتكلفك قد ماحتشتريها جاهزه تابعونا ومتنسوش اللايك والشير وشجعونا بكومنت عشان تشجيعكم ودعمكم هو اللى مخليمنا نكمل .

تقدرى تتابعى فيديو الاستربس وتعرفى طريقه التقطيع لاستربس الدجاج والتتبيله التحفه اللى بتديكى قرمشه خرافيه من الفيديو فى الاسفل :

تابعونا على

فيسبوك

يوتيوب

انستجرام

تويتر