 |
| مسقعه الباذنجان بدون قلى ولا تحمير خفيفه واقتصاديه |
المسقعه او الباذنجان بالصلصه من الاكلات الشعبيه المحببه عند الشعب المصرى وليها اكتر من طريقه ممكن تتعمل ساده او باللحمه المفرومه وبتتم اننا بنقلى الباذنجان فى الزيت ونعمل الصلصه ونحطها فيها بس النهارده احنا طريقتنا مختلفه عشان الناس اللى بتحب الاكل الصحى حنعمل باذنجان مسقعه بطريقه صحيه من غير قلى ولا تحمير وكمان طريقه اقتصاديه لعمل الباذنجان المسقعه وحنحط التاتش بتاعنا الجبنه المودزريلا على الوش بس انتوا ممكن تستغنوا عنها وتعملوها ساده بجد طريقه تحفه وحتعجبكوا اوى تابعونا على يوتيوب عشان توصلكوا كل وصفاتنا وحتلاقوا الفيديو فى المقاله تقدروا تتابعوا الوصفه بالتفصيل.
المكونات
حبة باذنجان كبيره
زيت
3 حبة طماطم
بصله متوسطه
جبنه مودزريلا
م.ك صلصه
فلفل اخضر او الوان
2 فص ثوم
ملح حسب الرغبه
م.ص بابريكا
نصف م.ص فلفل اسمر
يمكنكم مشاهده الطريقه على يوتيوب من هنا :
طريقة التحضير
فى البدايه حنجيب باذنجانه كبيره حنقشرها ونقطعها
مكعبات ونرش عليها شويه ملح بسيط عشان متسودش .
بعد كده حنجيب صينيه واسعه ونفرش عليها ورقة زبده ونسخن
الفرن بتاعنا كويس ونحط مكعبات الباذنجان على ورقة الزبده ونرش رشه زيت
خفيفه على الباذنجان ممكن نستخدم زيت زيتون لو حابين.
نحط الصينيه فى الفرن لحد ماتستوى نص سوى عشان متتهريش
لانها لسه حتستوى فى الصلصه اللى حنعملها ونسيبها بقى فى الفرن ونروح نعمل الصلصه
بتاعتنا.
فى الووق او طاسه غويطه شويه حنحط حبه زيت صغيرين
ونسيبهم يسخنوا ونقطع البصله بتاعتنا جوليان واول ما الزيت يسخن ننزل بالبصله
نديها تشويحه لحد ماتدبل بس معانا مش عاوزينها تتحمر.
نقطع الثوم بتاعنا قطع صغيره واول مالبصل يدبل معانا
ننزل بالتوم ونديله تشويحه كويسه لحد مانشم ريحه الثوم .
اول مانشم ريحة الثوم حننزل بالفلفل الاخضراو ممكن تحطى
فلفل الوان او ممكن كمان لو قرن شطه يعلى الطعم معانا بعد مانقطعهم مكعبات ونشوحهم
لحد مايدبلوا مع البصل والثوم.
بعد ما يدبل الفلفل الاخضر معانا حننزل بالصلصه المعلبه
نديها تشويحه وبعدين ننزل بالطماطم المبشوره ونشوحها مع المكونات الموجوده وبعد
كده حننزل بالتوابل .
بعد مانشم ريحة التوابل حننزل بنص كوباية ميه او اكتر
على حسب الكميه اللى عاملينها ونسيب الصلصه تتسبك معانا .
فى اللحظه دى لو بصينا على الباذنجان حنلاقيه بقى
نص سوا العمليه كلها مش حتاخد معانا 10 دقايق بالكتير نطلع الباذنجان من
الفرن وننسلكه من ورق الزبده هو مش حيلزق جامد بس نفرفره كده عشان ننزل بيه ف الصلصه على طول .
اول مالصلصه تتسبك معانا بننزل بالباذنجان اللى
حطيناه فى الفرن مع شوية زيت واستوى ونقلبه كويس مع الصلصه اوالتخديعه اللى احنا
عملناها ونسيبه يغلى معاها زى خمس دقايق كده عشان يتشرب من طعم المكونات اللى احنا
حطيناها والتوابل.
بعد كده بنرفع مسقعه الباذنجان بتاعتنا من على
النار وحنجيب صينيه ونحط فيها المسقعه سواء كلها او جزء منها وبعدين حنحط
على الوش طبقة جبنة مودزريلا بالكميه اللى احنا عاوزينها وزى ماقولت دى خطوه
اختياريه يعنى مش لازم نعملها.
حنحط الصينية اللى فيها المسقعه ومرشوش عليها
الجبنه المودزريلا فى الفرن لحد مالجبنه ماتسيح على الوش بس وبعد كده حنطلع
الصينيه من الفرن.
لو الطاسه اللى عملتى فيها ليها غطا ممكن ترشى الجبنه
المودزريلا على وش مسقعه الباذنجان وتغطيها وتسيبيها على النار من فوق مش
لازم الفرن .
وتقدميها بالطريقة اللى تعجبك بس بصراحه لو جربتى المسقعه
بالطريقة دى مش حتبطلى تعمليها لانها بتبقى اخف من المسقعه الاصليه عشان
مفيهاش تحمير وكميه الزيت قليله جدا .
لو عجبكو الموضوع والفيديو متنسوش تعملوا اشتراك على
الموقع وكمان على قناة اليوتيوب عشان توصلكوا كل
فيديوهاتنا ومواضيعنا ولو طبقتوا الوصفه ابعتولنا تطبيقاتكوا على صفحة الفيسبوك حنزلها باسمكوا وكمان تابعونا على صفحة الانستجرام .
Tags:( Related searches on google )
ليست هناك تعليقات:
إرسال تعليق