عملنا كيكة شيكولاته من غيرشيكولاته طريه وهشه ومن 3
طبقات الطبقه التالته حكايه حنعرف مع بعض المقادير والطريقه سهله جدا مش حتاخد وقت
سكرها مظبوط من حلاوتها مش حتبطلى تعمليها بس لو اول مره
تتابعونا متنسوش تعملوا لايك وشير واعملوا اشتراك للقناه وفعلوا زر الجرس عشان
توصلكوا كل وصفاتنا تعالو نشوف حنعمل ايه.
تقدرى تشوفى فيديو الوصفه من هنا :
المكونات :
اولا : مكونات الكيك :
نصف كوب زيت
نصف كوب سكر
2 بيضه
3 م.ك كاكاو خام
نصف كوب لبن
رشه ملح
كوب وربع دقيق
ملعقه صغيره بيكنج بودر
رشه فانيليا
ثانيا مقادير المهلبيه :
3 كوب لبن
3 ملعقه كبيره كاكاو خام
4ملعقه كبيره سكر
4 ملعقه كبيره نشا
ثالثا طبقه الكريمه
2 كيس كريم شانتيه
كوب لبن مثلج
طريقة التحضير :
اول حاجه حنبدا فى تحضير كيكة الشيكولاته حنجيب بوله
حنحط فيه عدد 2 بيضه وعليهم كيس فانيليا ونصف كوب سكر ونضرب كويس بمضرب سلك او
بالمضرب الكهربائى لحد اللون مايفتح معانا.
بعد كده حنحط نصف كوب لبن ونصف كوب زيت ونخلطهم كويس
بالبيض والفانيليا عشا السكر يدوب والمكونات تختلط ببعضها كويس.
حنجيب بعد كده الكاكاو الخام ننخله بمنخل او بمصفاه
ونبدا نخلط الكاكاو مع الخليط السابق لحد مايدوب كويس.
بعد كده حنجيب كوب وربع دقيق ننخلهم مع البيكنج بودر
ونخلطهم كويس جدا لحد الدقيق مايختفى ونتاكد ان الخليط مفيهوش اى تكتلات وطبعا فى
الفتره دى حنكون مسخنين الفرن كويس على درجة حراره 180 وحندهن صينيه بالزيت ونصب
فيها الخليط ولو لقيتى الخليط تقيل زياده عن اللزوم حنزود معلقتين كبار لبن .
حنصب بعد كده الخليط بتاع الكيك فى صينية مدهونه زيت
ونحطها فى الفرن لمده نصف ساعه وبعد كده نختبرها بخله ونشوف لو استوى حنطلع
الصينيه لو لسه ممكن نسيبه كمان خمس دقايق ونطلعها.
بعد مالكيكه تستوى ونطلعها نسيبها تهدى شويه وبعد كده
نقلبها على الناحيه التانيه وممكن نسيبها زى ماهى مفيش مشكله ونحط عليها كوبايه
لبن ونسيبها تبرد تماما.
حنحضر بعد كده خليط المهلبيه حنجيب الحله بتاعتنا ونحط
فيها 3 كوب لبن و3 معلقه كبيره نشا و 3 معلقه كبيره كاكاو خام و3 ملعقه كبيره سكر
ونخلطهم كويس وبعد كده نرفعهم على النار ونستمر فى التقليب لحد الخليط مايتقل
معانا والنشا يستوى.
بعد كده حنصب الخليط فى بوله ونغطيه بكيس لبن او استرتش
علشان ميعملش قشره ونسيبه يبرد خالص ونروح نحضر الكريم شانتيه.
حنجيب كيسين كريم شانتيه وعليهم كوب لبن مثلج ونخفقهم كويس
بالمضرب الكهربائى لحد الخليط مايتقل ويتضاعف حجمه ونحطه فى التلاجه لحد الكيكه
والمهلبيه مايبردوا.
بعد مالكيكه تبرد حنجيب خليط الكريم شانتيه ونفرده على
الكيكه بتاعتنا فى الصينيه ونسيب مسافه فى الصينيه عشان نحط فيها المهلبيه
بتاعتنا.
المهلبيه حتكون بردت معانا حنحطها فى كيس حلوانى او كيس
لبن ونقطع منه حته من الطرف ونبدأ نوزعها باى طريقه على الوش بتاع الكيكه فوق طبقه
الكريم شانتيه وبعد كده نزوقها بجوز الهند او الفورماسيل سواء شيكولاته او الوان
وممكن نرش كاكاو بودره على الوش .
حنحطها فى التلاجه مش اقل من ساعتين وبعدين تطلعيها
تقطعيها باى طريقه تعجبك وتقدميها بالطريقه اللى تعجبك وبالف هنا وشفا.
لو عجبكو الموضوع والفيديو متنسوش تعملوا اشتراك على الموقع وكمان على قناة اليوتيوب عشان توصلكوا كل فيديوهاتنا ومواضيعنا ولو طبقتوا الوصفه ابعتولنا تطبيقاتكوا على صفحة الفيسبوك حنزلها باسمكوا وكمان تابعونا على صفحة الانستجرام .
Tags:( Related searches on google )
ليست هناك تعليقات:
إرسال تعليق